deh las' Monday an' ah tired tired tired - 1/24/11

Ah really tired; dis mornin' ah tought ah had deh energy to tek a vigorous walk down to shop fuh gifts by the post office and den walk down Robb Street to Bourda fuh buy some fruit. Well, ay ain't mek it so far.

Deh hot wata was troublesome dis mornin' den ah had to axe meself since when ay need hot wata in Guyana... stewups. When ay get over dat comebackee behavior ah bade and get ready and guh downstairs. Ah had a good conversation an' eggs wid plantain an' cassava.

Ah dress and mek it downtown an' buy some really nice gifts and a tek a photo of deh girl so people could find sche and go down deh when deh wan' fuh buy some gifts.



Deh smile today is when ah walk across deh road toward St. George's cathedral to fin' Waterloo an' walk down deh avenue. As ah get to dat road runnin' round deh church ah look up to see nuff cars comin' so ay prepare to wait for a break in traffic. As ay look towards deh cars ah see a woman approach an' ah see sche stop at deh cross walk so ay start walkin' toward sche. As sche see me comin' sche smile an' sey while sche hold deh umbrella against deh wind.."don't worry chile deh ain't gon stop even doh deh see me standin' hey... dey ain't courteous attal' hey."

Ay kept walkin' an' we stand deh togehda an' wait and wait an' deh traffic continue fuh zip pass.. den one car stop an' sche and me walk across an' sche raise sche han' an' tank deh driver an' turn to me an' sey... "heh ah kno' it had to be a woman."